نورۋېگىيە ئۇيغۇر كومىتېتى تېلېفون يىغىنى ئېچىپ،بىر قىسىم يېڭى قارارلارنى ماقۇللىدى

يېقىندا نورۋېگىيە ئۇيغۇر كومىتېتى ھەيئەت ئەزالىرىنىڭ تېلېفون يىغىنى ئېچىپ، ئۆتكەنكى خىزمەتلەرنى خۇلاسىلەپ، تەجرىبىلەرنى يەكۈنلەش بىلەن بىر قىسىم يېڭى قارارلارنى ماقۇللاپ، كەلگۈسى خىزمەت پىلانىنى تۈزۈپ چىقتى  .4-ئاينىڭ 27-كۈنى دۇنيا ئۇيغۇر قۇرۇلتىيىنىڭ ئورۇنلاشتۇرۇشى بىلەن بىريۇسسېلدا ئېلىپ بېرىلغان «5000 كىشىلىك نامايىش» ئۆتكەنكى خىزمەتلەردىكى چوڭ تېما بولۇپ، دۇنيا ئۇيغۇر قۇرۇلتىيى «5000 كىشىلىك نامايىشقا تەييارلىق گۇرۇپپىسى»نىڭ نورۋېگىيەدىكى ئەزالىرى ئۆز ئىقتىدارىنى تولۇق نامايان قىلىپ، تۈرلۈك تەشۋىقات ماتېرىياللىرىنى تەييارلاپ، ئاممىۋى ئۇچۇر-ئالاقە تورلىرىدا تارقىتىپ، جامائەتچىلىكنى نامايىشقا سەپەرۋەر قىلىش خىزمەتلىرىنى چىڭ تۇتۇش بىلەن ۋەتەندىكى بىگۇناھ تۇتۇلغان، جازا لاگېرىغا ئېلىپ كېتىلگەن ۋە غايىب بولغانلارنىڭ تىزىملىكىنى تۇرغۇزۇپ، ئارخىپلاشتۇرۇش خىزمىتىنىمۇ ئىشلەپ، دۇنيا ئۇيغۇر قۇرۇلتىيىنىڭ خىزمەتلىرىگە يېقىندىن ياردەمدە بولدى. بۇ نامايىشقا نورۋېگىيەنىڭ ھەرقايسى شەھەر-رايونلىرىدىن بېرىپ قاتناشقان كىشىلەرنىڭ سانى 300 دىن ئارتۇق بولۇپ، يېشى 60 تىن ھالقىغان پېشقەدەملەردىن تارتىپ يېشىغا توشمىغان پەرزەنتلەرگىچە قاتنىشىپ، نامايىش قوشۇنلىرى ئىچىدە ئادەم سانىنىڭ كۆپلۈكى، تەرتىپلىكلىگى ۋە جەڭگىۋارلىقى بىلەن ئالاھىدە كۆزگە چېلىقتى

نورۋېگىيە ئۇيغۇر كومىتېتى يېقىنقى بىرقانچە ئاي ئىچىدە ئىشلىنىدىغان ئىشلارنى تۆۋەندىكىدەك بېكىتتى
ئۇيغۇر دوپپا مەدەنىيەت بايرىمى’ نى تۈرلۈك شەكىلدە ‘

 كەڭ تەشۋىق قىلىش، ئىمكان بار بۇ بىر قانچە كۈندە مىللىي خاسلىقىمىزنى ئىپادىلەيدىغان، بادام دوپپا ۋە چىمەن دوپپىلىرىمىزنى كىيىپ يۈرۈش.
ئۇيغۇر ئىسلام مەدەنىيەت مەركىزى بىلەن ھەمكارلىشىپ، كېلىش ئالدىدا تۇرغان رامزان ئېيى مۇناسىۋىتى بىلەن ياشلارغا ۋە چوڭلارغا ئايرىم-ئايرىم ھالدا ئىپتارلىق بېرىش،

رامزان مەزگىلىدىكى مۇناسىۋەتلىك خىزمەتلەردە ئۇيغۇر ئىسلام مەدەنىيەت مەركىزىگە ياردەمدە بولۇش.
ئۇيغۇر ئىسلام مەدەنىيەت مەركىزى بىلەن بىرلىكتە 6-ئاينىڭ ئاخىرلىرىدا «روزى ھېيت»مۇناسىۋىتى بىلەن ئوسلودا تەنتەربىيە ۋە سەنئەتنى ئاساس قىلغان «دالا سەيلىسى» ئۆتكۈزۈپ، جامائەتچىلىكنىڭ مەنىۋى تۇرمۇشىنى بېيىتىش. .
بۇ قېتىمقى ھەيئەت ئەزالىرى تېلېفون يىغىنىدا يەنە كومىتېتنىڭ تەشكىلى قۇرۇلمىسىنى كۈچەيتىشكە ۋە ۋەتەننىڭ داۋا ئىشلىرى ئۈچۈن قىلىشقا تېگىشلىك بولغان مۇھىم قارارلار ئېلىندى.

Norwégiye uyghur komitéti téléfon yighini échip,bir qisim yéngi qararlarni maqullidi

Yéqinda norwégiye uyghur komitéti hey’et ezalirining téléfon yighini échip, ötkenki xizmetlerni xulasilep, tejribilerni yekünlesh bilen bir qisim yéngi qararlarni maqullap, kelgüsi xizmet pilanini tüzüp chiqti.
4-ayning 27-küni dunya uyghur qurultiyining orunlashturushi bilen biryussélda élip bérilghan «5000 kishilik namayish» ötkenki xizmetlerdiki chong téma bolup, dunya uyghur qurultiyi «5000 kishilik namayishqa teyyarliq guruppisi»ning norwégiyediki ezaliri öz iqtidarini toluq namayan qilip, türlük teshwiqat matériyallirini teyyarlap, ammiwi uchur-alaqe torlirida tarqitip, jama’etchilikni namayishqa seperwer qilish xizmetlirini ching tutush bilen wetendiki bigunah tutulghan, jaza lagérigha élip kétilgen we ghayib bolghanlarning tizimlikini turghuzup, arxiplashturush xizmitinimu ishlep, dunya uyghur qurultiyining xizmetlirige yéqindin yardemde boldi. Bu namayishqa norwégiyening herqaysi sheher-rayonliridin bérip qatnashqan kishilerning sani 300 din artuq bolup, yéshi 60 tin halqighan péshqedemlerdin tartip yéshigha toshmighan perzentlergiche qatniship, namayish qoshunliri ichide adem sanining köplüki, tertiplikligi we jenggiwarliqi bilen alahide közge chéliqti. Norwégiye uyghur komitéti yéqinqi birqanche ay ichide ishlinidighan ishlarni töwendikidek békitti:
1) «uyghur doppa medeniyet bayrimi»ni türlük sekilde keng teshwiq qilish, imkan bar bu bir qanche künde milliy xasliqimizni ipadileydighan, badam doppa we chimen doppilirimizni kiyip yürüsh.
2) uyghur islam medeniyet merkizi bilen hemkarliship, kélish aldida turghan ramzan éyi munasiwiti bilen yashlargha we chonglargha ayrim-ayrim halda iptarliq bérish, ramzan mezgilidiki munasiwetlik xizmetlerde uyghur islam medeniyet merkizige yardemde bolush.
3) 6-ayning axirlirida uyghur islam medeniyet merkizi bilen birlikte «rozi héyt»munasiwiti bilen osloda tenterbiye we sen’etni asas qilghan «dala seylisi» ötküzüp, jama’etchilikning meniwi turmushini béyitish.
Bu qétimqi hey’et ezaliri téléfon yighinida yene komitétning teshkili qurulmisini kücheytishke we wetenning dawa ishliri üchün qilishqa tégishlik bolghan muhim qararlar élindi.