د ئۇ ق مۇئاۋىن رەئىسى باشچىلىقىدىكى ھەيئەت نورۋېگىيە پارلامېنتىدا «جازا لاگېرلىرى» مەسىلىسىنى ئاڭلاتتى

مەلۇم بولۇشىچە، نورۋېگىيە پارلامېنتىنىڭ تاشقى ئىشلار كومىتېتى ۋە دۆلەت مۇداپىئە كومىتېتىنىڭ يۇقىرى دەرىجىلىك ئەمەلدارلىرىنىڭ خىتاي زىيارىتى 28-ئاۋغۇست باشلانغان بولۇپ، خىتاي زىيارىتى داۋاملىشىۋاتقان بۈگۈنكى كۈندە نورۋېگىيە پارلامېنتىدىكى بەزى پارلامېنت ئەزالىرىنىڭ مەسلىھەتچىلىرى نورۋېگىيە پارلامېنت بىناسىدا دۇنيا ئۇيغۇر قۇرۇلتىيى مۇئاۋىن رەئىسى دوكتور ئەركىن ئەكرەم، نورۋېگىيە ئۇيغۇر كومىتېتى ئەزالىرىدىن كومىتېت رەئىسى بەختىيار ئۆمەر، كومىتېت كاتىپى ئادىلجان ئابدۇرېھىم ۋە خەلچەم مەمتىمىن قاتارلىق كىشىلەر

بىلەن كۆرۈشۈپ، نۆۋەتتىكى ئۇيغۇر ۋەزىيىتى ھەققىدە مەلۇمات ئالغان.

نورۋېگىيە ئۇيغۇر كومىتېتىنىڭ رەئىسى بەختىيار ئەپەندىنىڭ رادىيومىزغا بىلدۈرۈشىچە، د ئۇ ق مۇئاۋىن رەئىسى دوكتور ئەركىن ئەكرەم ۋە نورۋېگىيە ئۇيغۇر كومىتېتىنىڭ باشقۇرۇش ھەيئىتى ئەزالىرى، نورۋېگىيە پارلامېنتىدىكى بەزى سىياسىي پارتىيەلەرنىڭ پارلامېنت

ئەزالىرىنىڭ مەسلىھەتچىلىرى بىلەن ئۇچرىشىپ، ئۇلارغا ئۇيغۇر دىيارىدىكى جازا لاگېرلىرىغا قامالغان ئۇيغۇرلار توغرىسىدا، شۇنداقلا ئۇيغۇرلارنىڭ نۆۋەتتىكى ئېغىر ۋەزىيىتى توغرىسىدا مەلۇمات بەرگەن. ئۇ، بۇ بۇ ھەقتە توختالدى.

بەختىيار ئەپەندى نورۋېگىيە پارلامېنتى زىيارىتى جەريانىدا ھەيئەتنىڭ نورۋېگىيەنىڭ 200 يىللىق دېموكراتىيىگە ئۆتۈش تارىخى توغرىسىدىمۇ مەلۇمات ئىگىلىگەنلىكىنى بايان قىلدى.

نورۋېگىيە ئۇيغۇر كومىتېتى بىر قانچە ئايدىن بېرى ئارقا-ئارقىدىن نورۋېگىيە پارلامېنتىدىكى پارتىيەلەرنىڭ رەھبەرلىرى، پارلامېنت ئەزالىرى بىلەن ئۇچراشقان. بەختىيار ئەپەندى بۇ قېتىمقى ئۇچرىشىشمۇ شۇنداق ئۇچرىشىشلارنىڭ بىرى ئىكەنلىكىنى، ئۇچرىشىشنىڭ ئۇتۇقلۇق ئۆتكەنلىكىنى تەكىتلىدى.

دوكتور ئەركىن ئەكرەم ئەپەندى بۇ قېتىم نورۋېگىيە ئۇيغۇر كومىتېتىنىڭ تەكلىپىگە بىنائەن نورۋېگىيەگە كەلگەن بولۇپ، ئالدىمىزدىكى كۈنلەردە نورۋېگىيەدە دوكلات بېرىدىكەن. تېلېفون زىيارىتىمىزنى قوبۇل قىلغان دوكتور ئەركىن ئەكرەم ئەپەندى، نورۋېگىيە پارلامېنتىدىكى ئۇچرىشىشلاردىن نورۋېگىيە ئۇيغۇر كومىتېتىنىڭ خىزمەتلىرىنىڭ مۇۋەپپەقىيەتلىك ئۆتۈۋاتقانلىقىنى كۆرۈۋالغىلى بولىدىغانلىقىنى تىلغا ئالدى.

نورۋېگىيە ئۇيغۇر كومىتېتىنىڭ باشقۇرۇش ھەيئىتى ئەزاسى خەلچەم مەمتىمىن خانىم كومىتېتنىڭ تىرىشچانلىقى بىلەن نورۋېگىيە پارلامېنت ئەزالىرى بىلەن ئۆتكەن ھەپتىمۇ ئۇچراشقانلىقىنى، بۇندىن كېيىنمۇ داۋاملىق ئۇچرىشىپ ئۇيغۇرلارنىڭ جازا لاگېرلىرى توغرىسىدىمۇ داۋاملىق مەلۇمات بېرىپ تۇرىدىغانلىقىنى بايان قىلدى.

 

 

دوكتور ئەركىن ئەكرەم ئەپەندى ئالدىمىزدىكى ئايلاردا دۇنيا ئۇيغۇر قۇرۇلتىيى رەھبەرلىرىنىڭ يېقىندا نورۋېگىيە پارلامېنتىغا زىيارەت ئېلىپ بېرىپ، بىر يۈرۈش ئۇچرىشىشلارنى ئېلىپ بارىدىغانلىقىنى بىلدۈردى.

Melum bolushiche, norwégiye parlaméntining tashqi ishlar komitéti we dölet mudapi’e komitétining yuqiri derijilik emeldarlirining xitay ziyariti 28-awghust bashlan’ghan bolup, xitay ziyariti dawamlishiwatqan bügünki künde norwégiye parlaméntidiki bezi parlamént ezalirining meslihetchiliri norwégiye parlamént binasida dunya Uyghur qurultiyi mu’awin re’isi doktor erkin ekrem, norwégiye Uyghur komitéti ezaliridin komitét re’isi bextiyar ömer, komitét katipi adiljan abduréhim we xelchem memtimin qatarliq kishiler bilen körüshüp, nöwettiki Uyghur weziyiti heqqide melumat alghan.

Norwégiye Uyghur komitétining re’isi bextiyar ependining radiyomizgha bildürüshiche, d u q mu’awin re’isi doktor erkin ekrem we norwégiye Uyghur komitétining bashqurush hey’iti ezaliri, norwégiye parlaméntidiki bezi siyasiy partiyelerning parlamént ezalirining meslihetchiliri bilen uchriship, ulargha Uyghur diyaridiki jaza lagérlirigha qamalghan Uyghurlar toghrisida, shundaqla Uyghurlarning nöwettiki éghir weziyiti toghrisida melumat bergen. U, bu bu heqte toxtaldi.

Bextiyar ependi norwégiye parlaménti ziyariti jeryanida hey’etning norwégiyening 200 yilliq démokratiyige ötüsh tarixi toghrisidimu melumat igiligenlikini bayan qildi.

Norwégiye Uyghur komitéti bir qanche aydin béri arqa-arqidin norwégiye parlaméntidiki partiyelerning rehberliri, parlamént ezaliri bilen uchrashqan. Bextiyar ependi bu qétimqi uchrishishm

u shundaq uchrishishlarning biri ikenlikini, uchrishishning utuqluq ötkenlikini tekitlidi.

Norwégiye Uyghur komitétining bashqurush hey’iti ezasi xelchem memtimin xanim komitétning tirishchanliqi bilen norwégiye parlamént ezaliri bilen ötken heptimu uchrashqanliqini, bundin kéyinmu dawamliq uchriship Uyghurlarning jaza lagérliri toghrisidimu dawamliq melumat bérip turidighanliqini bayan qildi.

Doktor erkin ekrem ependi bu qétim norwégiye Uyghur komitétining teklipige bina’en norwégiyege kelgen bolup, aldimizdiki künlerde norwégiyede doklat béridiken. Téléfon ziyaritimizni qobul qilghan doktor erkin ekrem ependi, norwégiye parlaméntidiki uchrishishlardin norwégiye Uyghur komitétining xizmetlirining muweppeqiyetlik ötüwatqanliqini körüwalghili bolidighanliqini tilgha aldi.

Doktor erkin ekrem ependi aldimizdiki aylarda dunya Uyghur qurultiyi rehberlirining yéqinda norwégiye parlaméntigha ziyaret élip bérip, bir yürüsh uchrishishlarni élip baridighanliqini bildürdi.

xewer menbesi Erkin Asiya Radi’osi : https://www.rfa.org/uyghur/xewerler/    RFA  Ixtiyariy muxbiri erkin tarim.