Ghérip Qush

Ghérip qush

Rena aybala yashar

Sherq taman uchqan ghérip qush,
Salamimni birge élip ket.
Tileklirim bolsun yolluqum,
Ghéripliqni manga qoyup ket.

Mehellemning insanlirigha,
Yawropadin huzur élip ket.
Qoshup birey bir misqal ümüt,
Chüshkünlükni manga qoyup ket.

Ghérip dadam mükcheygen bili,
Timenlikni birge élip ket.
Anam belki körmes yiraqni,
Köz nurumni birge élip ket.

Merhumlarning rohi shatlansun,
Du’ayimni birge élip ket,
Yitimlerning aqmisun yéshi,
Sebirnimu bille élip ket.

Chöchektiki chin tömür batur,
Teyyar tursun,perman élip ket.
Qepestiki nuzugumlargha,
Hörlükümni birey élip ket.

Raziliqin sorap anamning,
Mektup yazdim birge élip ket.
Razi bolsun dadam heqqige,
Özürümni qoshup élip ket.

Baliliqta oynighan dostlar,
Amanmidur,salam élip ket.
Telim bergen heqtin ustazim,
Rehmitimni birge élip ket.

Amanmidur ana tupriqim,
Köz yéshimni birge élip ket.
Yaqa yurtta ghérip qaldi dep,
Hesritimni bille élip ket.

Qehritangha uchqan ghérip qush,
Baharimni qoshup élip ket.
Yiraqlardin, ümütke tolghan,
Tebessumni birge élip ket.